Дүн өвлийн хүйтэнд нүүрсгүй гэрт чичирэн, амьдарч байна гэж төсөөлөөд үз дээ. Төсөөлөн бодох төдийд хичнээн дулаахан орчинд байсан ч даардас хүрэх мэдрэмж төрж байгаа биз дээ. Ийм л нэгэн эгэл бор умгар гэрт нэгэн жаал хүү долдугаар ангийн эгч, ээж, аавтайгаа амьдардаг. Гэрийн эзэгтэй Уламжаргал эгч алган дээрээ бөмбөрүүлэн өсгөсөн хайртай аавыгаа нас барсанаас хойш амьдралын хатуу ширүүн нугачаанд хөл алдаж эхэлсэн гэдэг. Түүнтэй анх танилцсан маань 2011 оны 9 сард сан. Манай ажлынхан өрөөний засвараа хийж байхдаа пөөх паах болоод цонхруу гүйлдлээ. Хартал, манайхны архичин, гудамжных гэж нэрлэгддэг хүмүүсийн хүрээнд орох болов уу гэмээр халимаг үстэй эгч өөрөө болон нөхөр нь согтуу, дээр нь бие биенээ хэлэхгүй муу үгээр хэлэн хашгичин явах.
Үүнээс хойш 3 сарын дараа манай хүүхдийн төлөө хэлтэсийн дарга Д.Бадамцэцэг эгч гэрээт үйлчлэгчээр Уламжаргал эгчийг ажилд авсан юм. Ажилтнуудын хооронд янз бүрийн эерэг сөрөг шум эргэлдэн наадах нь яалтай. Гэхдээ л Уламаа эгчид итгэл өгөн ажилд авч, хоёр гурван удаа алдаа гаргахад зэмлэн уучилаад өнгөрөөсөнд нэг ч гэсэн хүнийг нийгмийн хүн болгохын төлөө агуу үйл бүтээж байгаа даргадаа талархнам. Уламаа эгчийн хувцас энд тэндээс цуглуулсан үзэмж муутай ч өдөр ирэх тусам цэвэрхэн болж ирж, нүүр царай нь хүртэл эрүүл, аз жаргалтай хүний туяа бага зэргээр гэрэлтэж ирж байна. Тэр энэ 2 сарын хугацаанд хуучин шигээ архи уухгүйг хичээн, хоёр хүүхдийнхээ төлөө өөрчлөгдөх ёстой гэсэн эрч хүчээр ажиллаж байна. Өглөө ажилдаа ирэхэд 00-н өрөөнөөс "Өглөөний мэнд", "Сайхан амарсан уу" гэж мэндлэх Уламаа эгчийн мэндчилгээнээс тэр өдөртөө ямар их ажиллах урам зориг авдаг гээч. Гэхдээ тэр өглөө бүр надаас түрүүлээд ирчсэн байдаг юм. Уламаа эгч ажилд орсондаа хязгааргүй их баяртай байгаа. Гэхдээ туршилтын хугацаанд, жинхлээгүй байсан болохоор гар дээр авах цалин шалихгүй. Нэгдүгээр сард л гэхэд 55000 төгрөг авсан. Харин энэ сараас цалингийн доод хэмжээ болох 144000 төгрөгийн цалин авна гэсэн баяртай мэдээг түрүүлж дуулгая.
Амьдралын сайн муу зүйлийг бишгүй үзсэн гэхэд Улмаа эгч өөрийгөө соёлтой гэж үздэг зарим хямсгаруудаас илүү чин сэтгэлээсээ хүнтэй мэндэлж, талархаж, ярилцах нь цаанаа л сэтгэлд дулаахан. Үнэхээр амьдралын нугачаанд хайр найргүйгээр өшгичүүлсэн ч, сөрөн гарах агуу их зориг сэтгэл түүнд байна. Өнгөрсөн сарын цалин арай л гар дээр ирээгүй үед Уламаа эгч мах, нүүрс байдаггүй ээ хэмээн хүн бүрээс 2000 төгрөг зээлүүлэхийг царайчлан асууж байлаа. Би хүртэл цалингаа хүлээж ядан байсан болохоор байхгүй ээ гээд л өнгөрлөө. Тэр орой энэ жилийн хамгийн ихээр хүйтэрсэн шөнө байсан. Дулаахан байранд өвөлжиж байгаа бид хүртэл дагжтал чичрэн, давхар хөнжилтэй унтсан даг. Шөнө сэрч хүүхдүүдийнхээ хучлагыг засах үедээ бид ийм зутруу байхад Уламаа эгчийн 2 хүүхэд галгүй гэрт, хоол ч идээгүй ямар хэцүү байгаа бол доо гэж бодон, тэдний өмнө асар их буруу зүйл хийсэндээ гэмшиж хоносон юм. Маргааш нь Уламаа эгчтэй хамт ирж хөргөгчинд бэлэн байснаас нь нэг хэсэг адууны мах, нэг хонины гуя, ойр зуур мах, аарц өглөө. Маргааш нь, хүүхдүүд зөндөө баярлаад, шөлтэй хоол, бууз хийж идлээ. Үнэндээ сүүлийн үед мах идээгүй ээ. Чадахаар нь жижиглэн л авдаг болхоор сайхан байна. Баярлалаа, баярлалаа" гээд л талархсанаа зөндөө илэрхийлж байна. Удалгүй, цалин бууж 55000 төгрөгнөөсөө гэртээ хүний хуучин телевизор авч тавьсан. Хүүхдүүд үзэх телевизтэй болж байгаа ч, үүнээс хэд үлдэх нь ойлгомжтой. Мягмар гарагт би хичээлгүй амардаг юм. Манай анги гэж дэлбэрчихсэн байсан болохоор ажилдаа очоод Уламаа эгчийг гуйж, хууч хөөрөнгөө ангиа цэмцийтэл цэвэрлэлээ. Сэтгэл шингэсэн бүхэн сайхан юм болохоор ангийн шал маань Уламаа эгчийн нямбайлан арчих тоолонгоор цэмцийгээд ирлээ. Дуусах үед, тэрээр отгоо эгчдээ мөнгө зээлүүлж чадах уу? Нүүрс авахгүй бол, ойр зуур цаасан хайрцаг цуглуулаад ч олигтой гал болохгүй нь ээ гэхээр нь цалингаасаа илүүчилж аппарат авах гэж хадгалж байгааруугаа ороод 10000 төгрөг өгөөд үүгээр хэд хоног түлэхээр нүүрс авчих аа уг нь тэр муу шуудайгаар авч байхаар хагас юм уу, хагасын хагас портероор авбал илүү хэмнэлттэй дээ гэж бас хошуу нэмэрлэн сургаад байгаам аа. Би хүртэл шуудайгаар нүүрс, килограмаар нь мах авахаар хамаг мөнгө урсаад, арвигүй байх шиг санагдаад голоо цохиод байдаг юм. Маргааш, Эгчид нь нэг нүүрс зарж байгаа зүс таних хүн тусалъя гэнэ ээ. Нүүрсэндээ явах гээд яарч байгаа болохоор 30000 төгрөг өгчихвөл тал портер нүүрс өгье. Өнөөдөртөө 3 шуудай нүүрс үнэгүй аваад түлж бай. Үлдсэнийг нь цалингаа буухаар өгнө биз гэнэ ээ гээд бөөн баяр... Өмнөөс нь баярлаад нөгөөхөөсөө 25000 төгрөг аваад өглөө. Ингээд ямар ч гэсэн тэднийх маань хэмнэж түлбэл сар гаруй хугацаанд түлэх түлштэй болсоон. Дулаахан гэрт хүүхдүүд хичээлээ хийгээд, хамтдаа телевизээ үзэж, хоолоо идэж чадна, цагаан сараа өнгөрөөж чадна.
Өнөөдөр гэртээ ирээд цэвэрлэгээ хийх гээд сууж байхдаа 1 жилийн өмнө хямдыг нь, хээнийх нь гоёыг бодоод авсан хивсэнцэрээ гаргаад шидчихмээр санагдаад. Даанч манайх балкон байхгүй. Ямар орцонд тавилтай биш. Хэ хэ. Цэвэрлэхэд амархан өнгө ордог ч, мяндсархаг утас нь гар шархдуулдагийг нь бодоод бушуухан утас аваад Уламаа эгчрүү залгалаа. Харамсалтай нь утас нь үгийн солиогүй унтарчихаад болдоггүй. Харин тэгсэн чинь удалгүй Уламаа эгч яасан бэ ямар нэгэн юм болоо юу, эгч нь яваад очих уу гэж хүний утаснаас яриад нээх удаагүй шуугиад ороод ирлээ. Хуучин, тэгээд хогийг нь ч шүүрдээгүй хуйлаад тавьсан байсан даа ичих ч шиг, үнэн учираа хэллээ. Ашгүй, уухайн тас өө ямар сайн юм. Баярлалаа. Ингэхэд, Отгоо чи минь намайг мөн ч их баярлуулж байна даа. Урьд насандаа надад өртэй байсан юм болов уу даа гээд Уламаа эгч хээ шаагүй байх нь харин ч эсрэгээрээ намайг маш их баярууллаа. Бас дөнгөж залгах төдийд яасан юм бол гэж санаа нь зовоод такси барин шуугиад ороод ирэхээр нь сэтгэл хөдөлсөндөө явсных нь дараа өөрийн эрхгүй нулимс под, под... Хамгаас хайртай аав, ээж, гэр бүлийнхнээсээ хол хүний нутагт энэ хэдэн жилийг өнгөрөөхдөө ингээд санаа тавиад, хүрээд ирэх хүн байгаагүй бүх л ачаагаа өөрийн нуруун дээрээ үүрч ирсэн надад юу юунаас илүү баян болсон юм шиг мэдрэмж төрж байна. Зогсоо зайгүй шингэн алдаад толгойгоо даахгүй болсон хүүгээ тэврээд эмнэлэг явах, нялх охиноо гэрт нь орон дотор нь өлгийдөж орхиод гэрээс ажил, ажилаас гэррүүгээ хар хурдаараа жирийх гэх мэт хүнд өдрүүдэд хамгийн тусалж өгсөн нь энэ хэдэн таксины жолооч нар л байж дээ.
За тэр ч яахав. Уламаа эгчтэй бага зэрэг танилцсан байх аа. Энэ л хүнд, энэ л гэр бүлд би ямар нэгэн аргаар тусламаар байна. Нөхөр нь архи ууж байгаад асуудал үүсгээд 1 сар хагасын хугацаатайгаар хоригдсон байгаа. Удахгүй гарч ирээд Уламаа эгчийг яаж өөрчлөгдөж байгааг харан өөрөө ч ухаарана гэдэгт итгэлтэй байна. Надад тулах цэг өгөөч, тэгвэл би... гэдэг шиг энэ л хүний нүдэнд өртөх нь битгий хэл нүд үзүүрлэгдэх энгийнээс энгийн, эмзэгээс эмзэг гэр бүлд таны, миний, түмэн олны тусламж хэрэгтэй байна. Би хувьдаа бодохдоо мөнгө цуглуулж байгаад саалийн үүлдрийн доод тал нь 2 үхэр хавар ногоонд залгах хүртэд хэрэглэх өвс тэжээлтэй нь аваад өгчихвөл нөхөр нь өөрийн гэсэн өмчтэй, ажилтай болохоор архи ууж, гутрах цаг гарахгүй. Тэгээд ч сүүг нь борлуулаад мах, гурилаа аваад байх юм уу гэж бодож байна. Бас нэг зүйл гэвэл орчин үед 3, 4 настай хүүхэд ч хэрэглээд байгаа компьютер гээч нөхрийг үзүүлэлт муу, оффисын үндсэн программ дээр ажиллаад, дуу клип үзэж сонсох төдий байсан ч хамаагүй хямдаас нь сонгоод 2 хүүхдэд аваад өгчихвөл үе тэнгийхнээсээ нэг юмаар ч гэсэн хоцролгүй сураад, цаашид сурах, амьдрах эрмэлзэл зорилготой болох юм болов уу гэж бодож байна.
Энэ тал дээр таны санал бодол ямар байна? Надтай хуваалцаарай. Хамтарч тусалж дэмжээд энэ гэр бүлд байгаа итгэлийн очийг гал болгон бадраая.
Хэрэв та туслахыг хүсвэл дараах дансанд мөнгө хандивлаарай. Энэхүү блог болон фэйсбүүк, твиттерээрээ тэдний тухай илүү их материал, зураг оруулж хэрхэн амьдарч, дэвшиж байгааг харуулж байх болно оо. Мөн дансны хуулгыг байнга нийтэлж, хэдэн төгрөгний орлоготой болсоныг тайлагнаж та бүхэнтэйгээ ярилцаад хамгийн үр дүнтэй гэсэн зүйлээр нь тэдэнд туслах бодолтой байна.
Хаан банк:
Долларын данс-5721350369
Төгрөгийн данс- 5029068256
Та бидний сайхан сэтгэлийн цучил энэхүү уулзварт нэгдэн нийлээд нэгэн айлыг халуун дулаан, эрүүл саруул амьдралын хэвшилд хөтөлж чадна гэдэгт итгэнэм. Миний бие Япон хэлний орчуулагч тул япон хэлрүү орчуулж тараах болно. Та бүхэн ч гэсэн боломжит хэлбэрээр нь танилын хүрээгээрээ дамжуулна уу.
